İLKİNxeber.az informasiya agentliyi məlumat verir ki, hadisə 16 iyun tarixində saat 17:00 radələrində Bakı–Quba avtomobil yolunda baş verib. Pərviz Əhmədovun idarə etdiyi “Mercedes” markalı avtomobil texniki nasazlıq səbəbindən yolun hərəkət hissəsində məcburi dayanıb.
Bildirilir ki, sürücü baş verə biləcək təhlükənin qarşısını almaq üçün qanunvericiliyin tələb etdiyi zəruri təhlükəsizlik tədbirlərini görmək əvəzinə, digər hərəkət iştirakçılarını yalnız əl işarələri ilə xəbərdar etməklə kifayətlənib.
Hadisə zamanı həmin zolaqda hərəkətdə olan motosiklet sürücüsü – 17 yaşlı Zəhra Mehdizadə mövcud vəziyyəti vaxtında düzgün qiymətləndirə bilməyərək idarə etdiyi nəqliyyat vasitəsi ilə dayanmış avtomobilə çırpılıb.
Qeyd olunur ki, Z.Mehrizadə motosikleti sürücülük vəsiqəsi olmadan idarə edib. Təcrübəsizlik və yol şəraitinə uyğun davranmaması qəzanın ağır nəticələnməsinə səbəb olub.
Ağır xəsarətlər alan yeniyetmə dərhal xəstəxanaya çatdırılsa da, həkimlərin səylərinə baxmayaraq onun həyatını xilas etmək mümkün olmayıb.
Faktla bağlı müvafiq araşdırma aparılır.
Baş Dövlət Yol Polisi İdarəsi bir daha sürücülərə müraciət edərək sürücülük hüququ olmadan sükan arxasına əyləşməməyə, məcburi dayanma zamanı təhlükəsizlik qaydalarına ciddi əməl etməyə və yollarda məsuliyyətli olmağa çağırır.
