Ağdam rayonunda mina partlayışı nəticəsində xəsarət alan şəxsin son vəziyyəti məlum olub.
ilkinxeber.az informasiya agentliyi xəbər verir ki, 1972-ci il təvəllüdlü Elmdar Sarıyev sentyabrın 6-da saat 05 radələrində Gəncə Şəhər Birləşmiş Xəstəxanasının nəzdindəki Abbas Səhhət adına xəstəxananın Təcili tibbi yardım şöbəsinə hospitalizasiya olunub.
TƏBİB-in məlumatına görə, ona sağ qolun kəsilmiş yarası və sağ daban sümüyünün sınığı diaqnozu qoyulub. Pasiyentə zəruri tibbi yardım göstərilib.
Hazırda Elmdar Sarıyevin müalicəsi müvafiq şöbədə davam etdirilir. Vəziyyəti orta ağır qiymətləndirilir.
Hadisə sentyabrın 5-də işğaldan azad edilmiş Ağdam rayonunun Sarıcalı kəndi ərazisində baş verib. Ağcabədi rayonunun Şotlanlı kənd sakini olan Elmdar Sarıyevin idarə etdiyi traktor minalardan təmizlənməmiş ərazidə tank əleyhinə minaya düşüb.
Partlayış nəticəsində traktor zədələnib, sürücü xəsarət alıb.
Faktla bağlı Ağdam Rayon Prokurorluğunda araşdırma aparılır.
