Azərbaycan Respublikasının Prezidenti İlham Əliyev iyulun 29-da Dünya Güləş Birliyinin prezidenti Nenad Laloviçi qəbul edib.
İlkinxeber.az informasiya agentliyi xəbər verir ki, görüş zamanı Prezident İlham Əliyev ilə Nenad Laloviç arasında əvvəlki görüşlər məmnunluqla xatırlanıb.
Nenad Laloviç dövlət başçısı ilə görüşdən böyük şərəf hissi duyduğunu bildirərək, Bakıda 17 yaşadək güləşçilər arasında keçirilən dünya çempionatının yüksək səviyyədə təşkil olunduğunu vurğulayıb. O, həmçinin bu yarışa və ümumilikdə Dünya Güləş Birliyinin fəaliyyətinə göstərilən dəstəyə görə Prezident İlham Əliyevə minnətdarlığını ifadə edib.
Qonaq Azərbaycanda güləş idman növünün inkişafını xüsusi qeyd edərək, ölkəmizdə beynəlxalq səviyyəli yarışların mütəmadi keçirildiyini xatırladıb və Azərbaycan Güləş Federasiyası ilə uğurlu əməkdaşlıq etdiklərini diqqətə çatdırıb.
Prezident İlham Əliyev isə çıxışında gənc idmançıların gələcək uğurları baxımından U-17 dünya çempionatının əhəmiyyətini vurğulayıb və bu kimi mötəbər idman tədbirlərinin Azərbaycanda keçirilməsinin önəmli olduğunu bildirib. Dövlət başçısı Azərbaycan güləşçilərinin qazandığı mühüm nailiyyətləri də xüsusi qeyd edib.
Görüşdə Azərbaycanda güləşin zəngin ənənələrə malik olduğu vurğulanıb, bu sahənin inkişafı istiqamətində dövlət səviyyəsində həyata keçirilən tədbirlərdən bəhs olunub.
Sonda Azərbaycan ilə Dünya Güləş Birliyi arasında əməkdaşlığın perspektivləri ətrafında fikir mübadiləsi aparılıb.
