Azərbaycanın tanınmış qrossmeysteri Şəhriyar Məmmədyarov Beynəlxalq Şahmat Federasiyasının (FIDE) yenilənmiş reytinq siyahısında mövqeyini yaxşılaşdırıb.
İlkinxeber.az informasiya agentliyi məlumat verir ki, FIDE iyulun 1-nə olan dünya şahmatçılarının reytinq cədvəlini açıqlayıb.
Yenilənmiş siyahıya əsasən, Şəhriyar Məmmədyarov 6 xal qazanaraq reytinqini 2723-ə çatdırıb və 26-cı pillədən 23-cü yerə yüksəlib. Təcrübəli şahmatçı ötən ay ərzində 11 reytinq partiyası keçirərək ELO göstəricisini artırmağa nail olub.
FIDE-nin ilk 100-lüyündə yer alan digər azərbaycanlı şahmatçıların mövqeləri isə belədir: Teymur Rəcəbov 2689 xalla 38-ci, Aydın Süleymanlı 2657 xalla 57-ci, Məhəmməd Muradlı 2642 xalla 78-ci, Rauf Məmmədov isə 2639 xalla 84-cü pillədə qərarlaşıb.
Qeyd edək ki, hesabat dövrü xüsusilə Məhəmməd Muradlı üçün uğurlu olub. O, iyun ayında reytinqinə 92 xal əlavə edərək dünya reytinqinin ilk 100-lüyünə daxil olub. 2500 və daha yüksək reytinq səviyyəsində bu cür sürətli yüksəliş nadir hallarda müşahidə olunur.
İyul ayının əvvəlinə olan reytinq cədvəlinin ilk onluğu belə sıralanır: Maqnus Karlsen (2823), Fabiano Karuana (2792), Hikaru Nakamura (2792), Cavoxir Sindarov (2777), Vinsent Kaymer (2767), Nodirbek Abdusattorov (2766), Uesli So (2765), Aniş Giri (2764), Arcun Eriqaysi (2757) və Vey İ (2753).
Qadın şahmatçıların reytinqində isə azərbaycanlılar arasında ən yüksək pillədə Ülviyyə Fətəliyeva qərarlaşıb. O, 2440 xalla 24-cü yerdədir. İlk 100-lükdə həmçinin Gövhər Beydullayeva (2375 xal, 64-cü yer), Xanım Balacayeva (2356 xal, 82-ci yer) və Gülnar Məmmədova (2350 xal, 86-cı yer) da yer alıblar.
