Azərbaycanda bəzi dövlət qulluqçuları əmək pensiyası hüququ əldə etməsələr belə, müəyyən şərtlər daxilində ömürlük sosial müavinət ala bilirlər.
İlkinxeber.az informasiya agentliyi xəbər verir ki, bunun üçün qanunvericilikdə nəzərdə tutulmuş tələblərə uyğun olmaq kifayətdir.
Mövcud qaydalara əsasən, inzibati və yardımçı vəzifələrdə çalışan dövlət qulluqçuları pensiya yaşına çatdıqda və ya əlilliyə görə könüllü şəkildə dövlət qulluğundan ayrıldıqları halda bu hüquqdan yararlana bilərlər. Bunun üçün onların ən azı 15 il dövlət qulluğu stajı olmalı və eyni zamanda əmək pensiyası almaq hüququ qazanmamış olmaları tələb edilir.
Müavinətin məbləği dövlət qulluqçusunun son vəzifəsi üzrə aldığı dövlət məvacibi əsasında hesablanır. Hesablama zamanı işdən çıxmazdan əvvəlki son 12 təqvim ayının orta aylıq əməkhaqqısı nəzərə alınır. Əgər şəxs dövlət qulluğunda 12 aydan az çalışıbsa, müavinət faktiki işlədiyi tam aylar üzrə müəyyən edilir.
Qanunvericiliyə görə, aylıq müavinət dövlət qulluqçusunun hesablanmış dövlət məvacibinin 15 faizi həcmində təyin olunur. Dövlət məvacibinə vəzifə maaşı ilə yanaşı, mükafatlar, qulluq stajına və ixtisas dərəcəsinə görə verilən əlavələr də daxil edilir.
Bu müavinət ömürlük verilir. Lakin şəxs sonradan yenidən dövlət qulluğuna qəbul olunarsa, müavinətin ödənişi dayandırılır.
Müavinət almaq istəyən şəxslər hüquqları yarandıqdan sonra yaşayış yeri üzrə Dövlət Sosial Müdafiə Fondunun yerli qurumlarına, DOST mərkəzlərinə və ya müvafiq əlaqələndirmə mərkəzlərinə müraciət edə bilərlər.
Müraciət zamanı şəxsiyyət vəsiqəsinin surəti, əmək kitabçasının surəti və ya ondan çıxarış, həmçinin son dövlət məvacibi barədə arayış təqdim olunmalıdır.
Qurum müraciətə 10 gün ərzində baxaraq qərar qəbul edir. Müavinətin təyin olunmasından imtina edilərsə, səbəb 5 gün ərzində rəsmi şəkildə müraciət edən şəxsə bildirilir. Vətəndaş bu qərardan inzibati qaydada və ya məhkəmə vasitəsilə şikayət verə bilər.
Qeyd edək ki, şəxs müavinət almaq hüququ qazandığı halda vaxtında müraciət etməyibsə, ödənişlər maksimum üç il əvvəlki dövr üçün hesablanaraq təqdim edilə bilər.
