“Farmaniya.com” işi üzrə hökm açıqlandı: Təqsirləndirilən şəxs 4 il azadlıqdan məhrum edildi
İLKİNxeber.az informasiya agentliyinin əldə etdiyi məlumata görə, “Farmaniya.com” adlı maliyyə piramidasının idarəçisi kimi tanınan Hüseyn Quliyevin cinayət işi üzrə məhkəmə araşdırması yekunlaşıb.
Bakı Ağır Cinayətlər Məhkəməsində keçirilən son iclasda hökm elan olunub. Məhkəmənin qərarına əsasən, Hüseyn Quliyev ona qarşı irəli sürülmüş cinayət yolu ilə əldə edilmiş əmlakın leqallaşdırılması ittihamı üzrə təqsirsiz hesab edilərək bəraət alıb.
Lakin məhkəmə onu təkrar dələduzluq və qanunsuz qumar oyunlarının təşkili maddələri ilə təqsirli bilərək 4 il müddətinə azadlıqdan məhrum edib.
Qeyd edək ki, dövlət ittihamçısı əvvəlki məhkəmə iclasında təqsirləndirilən şəxsə 10 il müddətinə azadlıqdan məhrumetmə cəzasının verilməsini istəmişdi.
İstintaq materiallarına əsasən, Hüseyn Quliyev vətəndaşlara yüksək gəlir vəd edərək müxtəlif məbləğlərdə sərmayə yatırmağa təşviq edib. Nəticədə 18 mindən çox şəxsin sistemdə qeydiyyatdan keçdiyi, təxminən 400 min manat vəsaitin isə dələduzluq yolu ilə əldə edildiyi müəyyən olunub.
Daxili İşlər Nazirliyinin Kibercinayətkarlıqla Mübarizə Baş İdarəsinin əməkdaşları tərəfindən keçirilmiş əməliyyat tədbirləri nəticəsində Hüseyn Quliyev ötən ilin qış aylarında saxlanılaraq cinayət məsuliyyətinə cəlb edilib.
Məlumat üçün bildirək ki, Hüseyn Quliyev sosial şəbəkələrdə “Zevs” ləqəbi ilə tanınan Ruslan Quliyevin qardaşıdır.
