İlkinxeber.az informasiya agentliyi məlumat verir ki, bu gündən etibarən Azərbaycanda qadınların pensiya yaşı 65-ə çatdırılaraq kişilərin pensiya yaşı ilə bərabərləşdirilib.
Xatırladaq ki, kişilər üçün pensiya yaşının 65-ə çatdırılması prosesi 2021-ci il iyunun 30-da tamamlanıb.
“Əmək pensiyaları haqqında” Qanunun 7-ci maddəsinə əsasən, kişilərin pensiya yaşı 2017-ci il iyulun 1-dən başlayaraq 2021-ci il iyulun 1-dək, qadınların pensiya yaşı isə 2017-ci il iyulun 1-dən başlayaraq 2027-ci il iyulun 1-dək hər il 6 ay artırılması nəzərdə tutulub.
Qanunvericiliyə görə, pensiya yaşına çatmış şəxsin fərdi hesabının sığorta hissəsində toplanmış pensiya kapitalı minimum pensiya məbləğindən az olmayan təminat yaratdıqda, sığorta stajından asılı olmayaraq yaşa görə əmək pensiyası təyin edilir. Əks halda isə, ən azı 25 il sığorta stajı tələb olunur (2017-ci il iyulun 1-dək pensiya təyin edilmiş şəxslər istisna olmaqla).
Hazırda minimum əmək pensiyasının məbləği 320 manat təşkil edir və yaşa görə əmək pensiyası vətəndaşlara ömürlük təyin olunur.
