Qazaxıstanda yeni yaradılan birpalatalı parlamentə ilk seçkilərin keçiriləcəyi tarix müəyyənləşib.
İLKİNxeber.az informasiya agentliyinin məlumatına görə, Qazaxıstan Prezidenti Kasım Jomart Tokayev bununla bağlı fərman imzalayıb. Fərmana əsasən, Kurultay adlanan yeni parlamentə ilk seçkilər avqustun 23-də keçiriləcək.
Sənədə əsasən, Qazaxıstanın Mərkəzi Seçki Komissiyasına seçkilərin hazırlanması və keçirilməsinin təşkili, hökumətə və yerli icra hakimiyyəti orqanlarına isə seçki prosesinin maddi texniki təminatının həyata keçirilməsi tapşırılıb. Fərman dərc olunduğu gündən qüvvəyə minib.
Qeyd edək ki, iyulun 1-dən Qazaxıstanın yeni Konstitusiyası qüvvəyə minib. Yeni əsas qanuna əsasən, ölkədə 145 deputatdan ibarət, 5 il müddətinə seçilən birpalatalı parlament fəaliyyət göstərəcək. Deputatlar Kurultaya yalnız siyasi partiyaların təqdim etdiyi siyahılar üzrə seçiləcəklər.
