Bakının Yasamal rayonu, Abay Kunanbayev küçəsində, Telefon qovşağının arxasında yerləşən yaşayış kompleksinin yaxınlığında növbəti yol-nəqliyyat hadisəsi baş verib.
İlkinxeber.az informasiya agentliyi Avtosfer.az-a istinadən xəbər verir ki, iyunun 30-da günorta saatlarında yaşayış kompleksinin həyətindən çıxan “Toyota Prius” markalı avtomobil pilləkəndən aşağı düşüb.
Həmin ərazidə iyulun 1-də səhər saatlarında da oxşar hadisə qeydə alınıb. Belə ki, 99-QD-175 dövlət qeydiyyat nişanlı “Changan” markalı avtomobil də pilləkəndən aşağı düşüb.
Sakinlərin sözlərinə görə, ərazidə bu cür hadisələr tez-tez yaşanır. Onlar gələcəkdə qəzaların qarşısını almaq üçün pilləkənin yaxınlığında, təxminən 5 metr məsafədə qoruyucu tumbaların quraşdırılmasını aidiyyəti qurumlardan xahiş edirlər.
Dünən baş verən hadisə ilə bağlı yayılan yeni görüntülər isə diqqət çəkib. Kadrlarda avtomobilin pilləkəndən düşdükdən sonra vətəndaşların onu çıxarmağa çalışdığı görünür. Bir neçə şəxsin cəhdinə baxmayaraq, avtomobili yerindən tərpətmək mümkün olmayıb. Avtomobil sahibinin evakuator çağırmaq istədiyi da bildirilir.
Bu zaman hadisə yerində olan qadınlardan biri avtomobilə yaxınlaşaraq çiyni ilə maşını itələməyə başlayıb. Gözlənilmədən avtomobil yerindən tərpənib və onu geri çəkmək mümkün olub.
Hadisə ətrafdakıların təəccübünə səbəb olub. Vətəndaşlar qadının cəsarətli və çevik davranışını alqışlayıblar. Qadın isə sakit şəkildə çantasını götürərək tanışı ilə birlikdə ərazidən uzaqlaşıb.
Sakinlər sözügedən ərazidə təhlükəsizlik tədbirlərinin gücləndirilməsinin vacibliyini bir daha vurğulayıblar.
