İlkinxeber.az informasiya agentliyi məlumat verir ki, Fövqəladə Hallar Nazirliyi (FHN) həftəsonu gözlənilən isti hava şəraiti ilə bağlı əhaliyə müraciət edib.
Bildirilib ki, Milli Hidrometeorologiya Xidmətinin proqnozuna əsasən, qarşıdan gələn şənbə və bazar günlərində ölkə ərazisində havanın temperaturu yüksələrək bəzi bölgələrdə 41 dərəcəyə çatacaq.
Nazirlikdən qeyd olunub ki, belə hava şəraitində kiçik ehtiyatsızlıq və diqqətsizlik, xüsusilə açıq sahələrdə və meşə massivlərində yanğınların baş verməsinə səbəb ola bilər.
Eyni zamanda, isti havalarda kondisioner və digər məişət cihazlarından istifadənin artması elektrik naqillərinin həddindən artıq yüklənməsi və qısaqapanma riskini yüksəldir.
FHN əhaliyə çağırış edərək bildirib ki, yüksək temperatur fonunda yanğın təhlükəsizliyi qaydalarına ciddi əməl olunmalıdır. Belə ki, evlərdə və iş yerlərində elektrik şəbəkəsi artıq yüklənməməli, elektrik avadanlıqları mütəmadi yoxlanılmalı, aşkar edilən nasazlıqlar dərhal aradan qaldırılmalıdır.
Həmçinin əkin sahələrində, xırmanlarda, ot tayalarının olduğu ərazilərdə açıq oddan istifadə edilməməli, siqaret çəkilməməlidir. Fərdi yaşayış evlərinin və təsərrüfat sahələrinin əraziləri quru ot və tullantılardan mütəmadi təmizlənməlidir.
Qeyd edilib ki, tam söndürülməmiş siqaret kötüyü, kibrit çöpü, eləcə də şüşə əşyaların ətrafa atılması ciddi yanğın təhlükəsi yaradır.
Bundan başqa, meşə ərazilərinə yaxın zonalarda yaşayan vətəndaşlar və istirahətə gedən şəxslər tonqal qalayarkən diqqətli olmalı, yalnız xüsusi ayrılmış yerlərdən istifadə etməli, tonqal nəzarətsiz buraxılmamalı və ərazi tərk edilərkən tam söndürülməlidir. Küləkli hava şəraitində isə tonqal qalamaq qadağandır.
