İlkinxeber.az informasiya agentliyi məlumat verir ki, Nazirlər Kabineti enerji sahəsində tətbiq olunan bir sıra qaydalarda dəyişiklik edib. Bununla bağlı Baş nazir Əli Əsədov müvafiq qərar imzalayıb.
Dəyişikliklərə əsasən, artıq bəzi təsərrüfat subyektləri sertifikatlaşdırma ilə bağlı məlumatları yalnız Energetika Nazirliyinə deyil, eyni zamanda Enerji Effektivliyi İnformasiya Sisteminə (EEİS) də təqdim etməlidirlər.
Yeni qaydalara görə, müəssisələrdə tətbiq olunan enerji menecment sistemi və bu sahədə əldə olunan nəticələr barədə illik hesabatlar tələb olunduğu halda, hər hesabat ilindən sonra növbəti ilin yanvar ayının sonuna qədər həm nazirliyə, həm də EEİS platformasına göndərilməlidir.
Bununla yanaşı, effektivlik potensialının qiymətləndirilməsi prosesi də artıq EEİS üzərindən həyata keçiriləcək. Təsərrüfat subyektləri hesabatlarını yazılı və ya elektron formada sistem vasitəsilə təqdim edəcək.
Qeyd olunub ki, qiymətləndirmənin nəticələri 5 iş günü ərzində həmin subyektin EEİS-dəki elektron kabinetinə yerləşdiriləcək.
