Almaniyada yaşayan azərbaycanəsilli güləşçi Mədinə Abbasova (49 kq) son görüşü ilə bağlı fikirlərini bölüşüb.
İlkinxeber.az informasiya agentliyi xəbər verir ki, idmançı dünənki qarşılaşmada məğlubiyyətin əsas səbəblərindən birinin məşqçilərin qərarları ilə bağlı olduğunu bildirib. Onun sözlərinə görə, vaxtında etiraz edilsəydi, xal qazanaraq qələbə əldə etmək mümkün idi.
Mədinə Abbasova qeyd edib ki, altı yaşından Almaniyada yaşayır və artıq bu ölkəyə uyğunlaşıb. Bununla belə, o, Azərbaycanda güləşə olan diqqətin daha yüksək olduğunu vurğulayıb. İdmançı bildirib ki, azərbaycanlı güləşçilər texniki baxımdan daha güclüdürlər.
O, ilk dəfədir ki, Azərbaycanda yarışdığını desə də, yay aylarında tez-tez Bakıya gəldiyini əlavə edib. Hələlik Azərbaycan millisində çıxış etməyi düşünmədiyini deyən Abbasova, komanda yoldaşlarının ona daim dəstək göstərdiyini də qeyd edib.
Güləşçi Almaniyada məşqlərin sayının az olmasından da narazılığını ifadə edib. Onun sözlərinə görə, Azərbaycanda bu sahəyə daha çox diqqət ayrılır və məşq prosesi daha intensiv keçirilir. O, imkan olduqca öz çəkisində çıxış edən idmançıları izlədiyini, xüsusilə Mariya Stadnikin çıxışlarını diqqətlə izlədiyini bildirib.
Qeyd edək ki, Mədinə Abbasova yarışın 1/4 final mərhələsində məğlub olaraq mübarizəni dayandırıb.
