Bu ilin may ayında kənd təsərrüfatının inkişafı ilə bağlı qəbul edilən Dövlət Proqramında Naxçıvanla bağlı xüsusi müddəaların yer aldığını və bölgənin inkişafı istiqamətində əlavə tədbirlərin görüləcəyini Prezident İlham Əliyev bildirib.
İlkinxeber.az informasiya agentliyi xəbər verir ki, dövlət başçısı bu barədə AzTV-yə müsahibəsində danışıb.
Prezidentin sözlərinə görə, Naxçıvanla bağlı əlavə tədbirləri nəzərdə tutan növbəti Sərəncamın imzalanması planlaşdırılır. Sənədin böyük maliyyə tutumuna malik olacağı və burada konkret layihələrin müəyyənləşdiriləcəyi bildirilib.
İlham Əliyev qeyd edib ki, görüləcək işlərin icrasına lazımi nəzarət təmin olunacaq və bununla da Naxçıvanda inkişaf proseslərinin daha da sürətləndirilməsi nəzərdə tutulur.
Dövlət başçısı Naxçıvan, Qarabağ və Şərqi Zəngəzurun vahid konsepsiya əsasında inkişaf etdirilməsinin vacibliyini vurğulayıb.
Prezident bildirib ki, işğaldan azad edilmiş ərazilərdə şəhərlərin Baş planları artıq təsdiqlənib. Onun sözlərinə görə, Naxçıvan şəhərinin də Baş planının hazırlanması ilə bağlı göstəriş verilib və sənəd artıq təqdim olunub.
Baş plan çərçivəsində Naxçıvan şəhərinin inkişafı, müasir infrastrukturun yaradılması və digər istiqamətlər üzrə əlavə tədbirlərin həyata keçirilməsi nəzərdə tutulur.
