29 avqust 2026-cı il tarixində planlaşdırılan bir sıra Bakı-Naxçıvan-Bakı aviareysləri əlverişsiz hava şəraiti, xüsusilə ildırım aktivliyi səbəbindən təxirə salınıb.
ilkinxeber.az informasiya agentliyi xəbər verir ki, bu barədə “Azərbaycan Hava Yolları” QSC-nin Mətbuat Xidməti məlumat yayıb.
Bildirilib ki, hava şəraiti sabitləşdikdən sonra uçuşların icrası bərpa olunacaq. Sərnişinlər uçuşlarla bağlı mümkün dəyişikliklər barədə məlumatlandırılacaqlar.
Qurumun məlumatına görə, Naxçıvanın coğrafi mövqeyi və dağlıq relyefi bölgədəki meteoroloji şəraitin uçuşlara təsirini artırır. Güclü külək, küləyin istiqamətinin qəfil dəyişməsi və ildırım aktivliyi təyyarələrin eniş və qalxışı zamanı əlavə risklər yarada bilər.
Qeyd olunub ki, reyslərin təxirə salınması və ya ləğvi yalnız hava limanında müşahidə olunan vəziyyətə əsasən müəyyən edilmir. Qərar marşrut boyunca, eləcə də qalxış və eniş hava limanlarında mövcud və proqnozlaşdırılan hava şəraiti nəzərə alınmaqla qəbul edilir.
“Azərbaycan Hava Yolları”ndan vurğulanıb ki, sərnişinlərin təhlükəsizliyinin təmin edilməsi məqsədilə ekipaj və əməliyyat xidmətləri beynəlxalq aviasiya təhlükəsizliyi standartlarına uyğun qərarlar qəbul edirlər.
