“Qarış-qarış Vətən” layihəsi çərçivəsində Azərbaycanın rayonlarını piyada gəzən 24 yaşlı Bəhruz Hümbətov yürüşünü davam etdirir.
İlkinxeber.az informasiya agentliyi məlumat verir ki, Meşəli kənd sakini olan Bəhruz Hümbətov Xocalıdan başladığı yürüş çərçivəsində artıq 47-ci rayona çatıb və indiyədək ümumilikdə 2280 kilometr məsafəni piyada qət edib.
Layihə çərçivəsində Bəhruz Hümbətov səfər etdiyi bölgələrdə şəhidlərin ailələrini və evlərini ziyarət edir, onların ailə üzvləri ilə görüşərək şəhidlərin xatirəsini yad edir.
Hazırda o, Cəlilabad rayonunun Alar kəndində şəhid Hüseynli Əkbər Azər oğlunun evindədir.
Bəhruz Hümbətov “Qarış-qarış Vətən” layihəsini həyata keçirmək üçün təhsilini müvəqqəti olaraq dondurub. O, Azərbaycan Dövlət Mədəniyyət və İncəsənət Universitetinin nəzdində bədii yaradıcılıq istiqaməti üzrə ssenarist və aktyorluq ixtisasında təhsil alır.
Bəhruz Hümbətovun sözlərinə görə, layihəni başa çatdırdıqdan sonra təhsilini davam etdirəcək.
“Qarış-qarış Vətən” layihəsinin əsas məqsədi Azərbaycanın rayonlarını qarış-qarış gəzərək şəhidlərin xatirəsini yad etmək, şəhid ailələrini ziyarət etmək və Vətən uğrunda göstərilən qəhrəmanlığı gələcək nəsillərə çatdırmaqdır.
Qeyd edək ki, Bəhruz Hümbətovun babası Hümbətov Bəhlul Müseyb oğlu Meşəli kəndinin müdafiəsi uğrunda gedən döyüşlərdə şəhid olub.
