İlkinxeber.az informasiya agentliyi məlumat verir ki, Milli Hidrometeorologiya Xidmətinin açıqladığı aylıq proqnoza əsasən, oktyabr ayında Azərbaycanda havanın orta aylıq temperaturunun əsasən iqlim normasına yaxın, bəzi ərazilərdə isə normadan bir qədər yüksək olacağı gözlənilir.
Aylıq yağıntının miqdarının da əsasən normaya yaxın, bəzi ərazilərdə isə normadan bir qədər çox olacağı ehtimal edilir.
Proqnoza görə, oktyabrın ilk ongünlüyünün ilk yarısında ölkə ərazisində hava fasilələrlə yağıntılı keçəcək. Bəzi yerlərdə leysan xarakterli intensiv yağış, şimşək və dolu ehtimalı var. Dağlıq ərazilərdə yağıntının sulu qar şəklində düşəcəyi bildirilir.
Bakıda və Abşeron yarımadasında orta aylıq temperaturun 16-19°C isti olacağı gözlənilir. Gecələr temperatur 13-18°C, gündüzlər isə əsasən 18-23°C, bəzi günlərdə 25-27°C olacaq.
Naxçıvan bölgəsində orta aylıq temperaturun 16-19°C, gündüzlər isə 23-28°C, bəzi günlərdə 30-33°C isti olacağı proqnozlaşdırılır.
Dağlıq və dağətəyi rayonlarda temperatur daha aşağı olacaq. Xankəndi, Şuşa, Daşkəsən-Gədəbəy və ətraf ərazilərdə gecələr 5-10°C, gündüzlər isə 13-18°C isti gözlənilir.
Qərb bölgəsində, o cümlədən Gəncə, Qazax, Tovuz və Şəmkir ərazilərində gündüz temperaturunun əsasən 19-24°C, bəzi günlərdə isə 26-28°C olacağı bildirilir.
Şimal və şimal-qərb rayonlarında gündüzlər 17-22°C, bəzi günlərdə 25-28°C isti, dağlıq ərazilərdə isə daha sərin hava şəraiti gözlənilir.
Mərkəzi Aran rayonlarında gündüz temperaturu əsasən 19-24°C, bəzi günlərdə 26-29°C təşkil edə bilər.
Cənub bölgəsində, o cümlədən Cəlilabad, Masallı, Lənkəran, Astara və Biləsuvar rayonlarında orta aylıq temperaturun 15-18°C isti olacağı gözlənilir. Gündüzlər temperatur əsasən 18-23°C, bəzi günlərdə isə 26°C-yə çata bilər.
Ümumilikdə, oktyabr ayında ölkə üzrə həm mülayim və nisbətən isti günlərin, həm də yağıntılı hava şəraitinin müşahidə olunacağı gözlənilir.
