İlkinxeber.az informasiya agentliyi məlumat verir ki, Yeni Suraxanı-Hövsan dəmir yolu xəttinin tikintisi ilə bağlı layihələndirmə işlərinin 30 faizi artıq tamamlanıb.
Bu barədə jurnalistlərə açıqlamasında “Azərbaycan Dəmir Yolları” QSC-nin İctimaiyyətlə əlaqələr şöbəsinin müdiri Bəxtiyar Hacıyev məlumat verib.
O bildirib ki, layihə çərçivəsində 111 mülkiyyətçi qeydiyyata alınıb, onlara müvafiq kompensasiyalar ödənilib. Dəmir yolu xəttinin mühafizə zonasına düşən obyektlərin söküntüsü də artıq başa çatdırılıb.
Məlumata görə, layihə çərçivəsində ümumilikdə 4 stansiyanın tikintisi və ya bərpası nəzərdə tutulur. Həmin stansiyalardan 3-ü Hövsan qəsəbəsinin ərazisində yerləşəcək.
Yeni dəmir yolu xəttinin istifadəyə verilməsi ilə bağlı əlavə məlumat hələ açıqlanmayıb.
