İLKİNxeber.az informasiya agentliyi məlumat verir ki, iyunun 19-da Xankəndi şəhərinə və Ağdərə rayonuna növbəti köç prosesi həyata keçirilib.
Məlumata görə, bu mərhələdə Xankəndi şəhərinə 68 nəfərdən ibarət 18 ailə, Ağdərə rayonunun Aşağı Oratağ kəndinə isə 12 nəfərlik 2 ailə köçürülüb.
Köçürülən sakinlərə mənzillərin açarları Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhrəmanov və Bərpa, Tikinti və İdarəetmə Xidmətinin direktor müavini Mahmud Əfəndiyev tərəfindən təqdim olunub.
Tədbir zamanı çıxış edən Səbuhi Qəhrəmanov sakinləri doğma yurdlarına qayıtmaları münasibətilə təbrik edib. O bildirib ki, bölgədə genişmiqyaslı bərpa və quruculuq işləri aparılır, əhalinin rahat və təhlükəsiz yaşayışı üçün zəruri infrastruktur yaradılıb, sosial obyektlər istifadəyə verilib.
Qeyd olunub ki, qayıdan vətəndaşların məşğulluğunun təmin edilməsi istiqamətində də mühüm addımlar atılır. Yeni iş yerləri yaradılır, peşə hazırlığı proqramları həyata keçirilir və dayanıqlı məşğulluğun təmin olunması dövlətin əsas prioritetlərindən biridir.
Bununla yanaşı, ANAMA əməkdaşları tərəfindən köç edən sakinlər üçün mina təhlükəsizliyinə dair maarifləndirici görüş keçirilib. Görüşdə mina və partlamamış hərbi sursatların yaratdığı təhlükələr, riskli ərazilərdə davranış qaydaları və şübhəli əşyalar aşkar edilən zaman görülməli tədbirlər barədə ətraflı məlumat verilib.
Sakinlər isə doğma torpaqlarına qayıtmağın sevincini bölüşərək göstərilən diqqət və qayğıya görə minnətdarlıqlarını ifadə ediblər.
