Talassemiya gen daşıyıcıları hərbi xidmətə yararlı hesab olunur
Talassemiya xəstəliyinin gen daşıyıcısı olan vətəndaşların hərbi xidmətə yararlılığı ilə bağlı məsələyə aydınlıq gətirilib.
İLKİNxeber.az xəbər verir ki, Səfərbərlik və Hərbi Xidmətə Çağırış üzrə Dövlət Xidməti bununla bağlı açıqlama yayıb.
Bildirilib ki, Azərbaycan Respublikası Nazirlər Kabinetinin 29 fevral 2008-ci il tarixli, 59 nömrəli qərarı ilə təsdiq edilmiş “Hərbi həkim ekspertizası haqqında Əsasnamə”yə əsasən, talassemiya xəstəliyinin gen daşıyıcısı olan şəxslər hərbi xidmətə yararlı sayılırlar.
Qeyd olunub ki, “Xəstəliklər cədvəli”nin I qrafasının tələblərinə uyğun olaraq, “talassemiya xəstəliyinin gen daşıyıcısı” diaqnozu ilə şəhadətləndirilən çağırışçılara A 3 təyinat göstəricisi verilir və onlar hərbi xidmət keçə bilirlər.
Məlumata görə, çağırışçıların hərbi xidmətə yararlılıq dərəcəsi hərbi həkim komissiyaları tərəfindən sağlamlıq vəziyyətinə əsasən müəyyən edilir. Mövcud qaydalara əsasən talassemiya gen daşıyıcılığı hərbi xidmətə maneə yaradan hal hesab edilmir.
