Avstriyanın Qrats şəhərində keçirilən gənclər arasında cüdo üzrə Avropa Kubokunda Azərbaycan millisi uğurlu çıxışla yadda qalıb.
ilkinxeber.az xəbər verir ki, yarışın ilk günündə yığmamızın hesabına bir qızıl medal yazılıb.
66 kq çəki dərəcəsində tatami üzərinə çıxan Məhəmməd Musayev bütün rəqiblərini məğlub edərək turnirin qalibi olub. O, yarış boyunca Almaniya, Xorvatiya, Belçika və Macarıstan təmsilçiləri üzərində inamlı qələbələr qazanaraq finala yüksəlib.
Həlledici qarşılaşmada serbiyalı Marko Yorqiç ilə üz-üzə gələn Azərbaycan təmsilçisi rəqibini ipponla məğlub edərək qızıl medala sahib çıxıb.
Hazırda aktivində 1 qızıl medal olan Azərbaycan millisi oğlanların medal cədvəlində lider mövqedə qərarlaşıb. Komanda ümumi sıralamada isə ilk beşlikdə yer alır.
