İlham Əliyev Çin və İtaliya şirkətlərinin rəhbərlərini qəbul edib

ilkinxeber.az informasiya agentliyi məlumat verir ki, Azərbaycan Respublikasının Prezidenti İlham Əliyev sentyabrın 24-də Çinin “01.AI” və “Sinovation Ventures” şirkətlərinin baş icraçı direktoru Kei-Fu Lini, həmçinin İtaliyanın “TEHA Group” şirkətinin Beynəlxalq sammitlər üzrə koordinatoru və Səudiyyə Ərəbistanı üzrə inkişaf rəhbəri Filippo Malinvernonu qəbul edib.
Qonaqlar qəbul üçün dövlət başçısına təşəkkürlərini bildiriblər. Onlar Bakıda Prezident İlham Əliyevin himayəsi ilə keçiriləcək İkinci Azərbaycan Beynəlxalq İnvestisiya Forumunda iştirak edəcəklərini qeyd edib və tədbirin əhəmiyyətindən danışıblar.
Prezident İlham Əliyev Azərbaycanın həm Çin, həm də İtaliya ilə sıx əlaqələrə malik olduğunu vurğulayıb. Dövlət başçısı hər iki ölkədən olan iş adamlarının Azərbaycana investisiya yatırdığını bildirib.
Görüş zamanı Azərbaycanın 2025–2028-ci illər üçün Süni İntellekt Strategiyasının təsdiq edildiyi diqqətə çatdırılıb. Ölkədə formalaşdırılan əlverişli biznes mühiti, yerli sahibkarlarla yanaşı, xarici investorlar üçün yaradılan imkanlar barədə fikir mübadiləsi aparılıb.
Tərəflər, həmçinin yaşıl enerji, kibertəhlükəsizlik, təhsil və digər sahələrdə süni intellektin praktiki tətbiqi, eləcə də Azərbaycanla sözügedən şirkətlər arasında əməkdaşlığın genişləndirilməsi imkanlarını müzakirə ediblər.