Özbəkistanın Baş prokuroru Niqmatilla Yuldoşevin rəhbərlik etdiyi nümayəndə heyəti Azərbaycana işgüzar səfəri çərçivəsində Kəlbəcər və Gəncə şəhərlərində olub.
İlkinxeber.az informasiya agentliyi xəbər verir ki, səfər zamanı qonaqlar Kəlbəcər şəhəri və İstisu ərazisində həyata keçirilən genişmiqyaslı bərpa və yenidənqurma işləri ilə yaxından tanış olublar. Onlara bölgədə icra olunan infrastruktur layihələri, sosial-iqtisadi inkişaf istiqamətində görülən tədbirlər və dayanıqlı məskunlaşmanın təmin olunması barədə ətraflı məlumat təqdim edilib.
Kəlbəcər rayonunda Prezidentin xüsusi nümayəndəsi Bəşir Hacıyev nümayəndə heyətinə rayonda həyata keçirilən quruculuq işləri, yaradılan müasir infrastruktur, əhalinin mərhələli şəkildə doğma torpaqlara qayıdışı və gələcək inkişaf perspektivləri barədə geniş məlumat verib.
Bildirilib ki, Prezident İlham Əliyevin müəyyən etdiyi inkişaf strategiyasına uyğun olaraq Qarabağ və Şərqi Zəngəzur iqtisadi rayonlarında müasir şəhərsalma prinsipləri əsasında bərpa və quruculuq işləri ardıcıl şəkildə davam etdirilir.
Səfər proqramı çərçivəsində nümayəndə heyəti Gəncə şəhərində də olub. Qonaqlar Vətən müharibəsi zamanı Ermənistan silahlı qüvvələrinin raket hücumları nəticəsində həlak olmuş mülki şəxslərin xatirəsinə ucaldılmış Memorial Kompleksi ziyarət ediblər. Onlara Gəncəyə edilən raket hücumları, dinc əhaliyə qarşı törədilmiş faciələr və bu hadisələrin ağır nəticələri barədə ətraflı məlumat verilib.
Şəhərlə tanışlıq çərçivəsində nümayəndə heyəti Gəncənin tarixi və mədəni irsini əks etdirən Şah Abbas Məscidini, İmamzadə dini-memarlıq kompleksini və dahi Azərbaycan şairi Nizami Gəncəvinin məqbərəsini ziyarət edib.
Bununla da nümayəndə heyətinin Azərbaycana işgüzar səfəri başa çatıb.
