Böyük Britaniya, Bolqarıstan və Ukrayna İrana qarşı hərbi əməliyyatlarda iştirak etməyəcəklərini rəsmi kanallar vasitəsilə Tehrana çatdırıblar.
ilkinxeber.az informasiya agentliyinin əldə etdiyi məlumata görə, bunu İran Xarici İşlər Nazirliyinin rəsmi nümayəndəsi İsmayıl Bəqai dövlət televiziyasına müsahibəsində açıqlayıb.
Onun sözlərinə görə, son 24 saat ərzində adı çəkilən ölkələrdən İrana çoxsaylı əlaqələr olub və söhbətlər zamanı həmin dövlətlər İrana qarşı mümkün hərbi qarşıdurmada iştirak etməyəcəklərini bildiriblər.
İsmayıl Bəqai eyni zamanda Hörmüz boğazının əvvəlki təhlükəsizlik formatına qaytarılmasının mümkün olmadığını deyib. O qeyd edib ki, İran və Oman yeni təhlükəsiz dəniz marşrutunun yaradılması istiqamətində danışıqlar aparır. Bildirilib ki, yeni marşrut hər iki ölkənin qarşılıqlı razılığı əsasında müəyyən ediləcək və İranın suveren hüquqlarının qorunmasını təmin edən mexanizm formalaşdırılacaq.
Diplomat əlavə edib ki, Tehran Pakistan və Türkiyə ilə də məsləhətləşmələr apararaq İrana qarşı istənilən düşmənçilik addımının mümkün nəticələri barədə məlumat verib.
Bəqai ABŞ tərəfindən səsləndirilən təhdidlərin İran üçün yeni olmadığını vurğulayaraq bildirib ki, ölkəsi milli maraqlarını əsas götürür və xarici təzyiqlər fonunda öz mövqeyini dəyişmək niyyətində deyil.
