Bakının Xəzər rayonunda buraxılış imtahanında az bal toplayan yeniyetmənin anası qayınatası tərəfindən döyülüb.
İlkinxeber.az informasiya agentliyi xəbər verir ki, hadisə Şüvəlan qəsəbəsində baş verib.
Məlumata görə, 1961-ci il təvəllüdlü Həsənağa Quliyevin (adı və soyadı şərtidir) nəvəsi buraxılış imtahanında 130 bal toplayıb. İmtahan nəticəsi ailədə narazılığa səbəb olub.
Bildirilir ki, nəticədən əsəbiləşən H.Quliyev uşağın az bal toplamasında gəlinini günahlandıraraq onunla mübahisə edib. Mübahisə zamanı qayınata gəlinini döyüb, daha sonra stolun üzərində olan stəkanı onun sifətinə atıb.
Stəkanın qırılması nəticəsində qadının üz nahiyəsinə xəsarət yetirilib.
Hadisə yerinə polis əməkdaşları cəlb olunub və H.Quliyev saxlanılıb. Faktla bağlı cinayət işi başlanaraq Xəzər Rayon Məhkəməsinə göndərilib.
Məhkəmə istintaqı zamanı tərəflərin barışdığı bildirilib. Bu səbəbdən cinayət işinə xitam verilib.
