Qazaxıstan və Azərbaycan arasında Xəzər dənizi üzərindən sərnişin daşımalarının bərpası gözlənilir.
ilkinxeber.az informasiya agentliyi xəbər verir ki, Qazaxıstanın Azərbaycandakı səfiri Alim Bayel Kurık-Bakı-Kurık marşrutu üzrə bərə xəttində sərnişin daşımalarının yenidən həyata keçirilməsini təklif etdiklərini açıqlayıb.
Diplomatın sözlərinə görə, bu marşrut üzrə sərnişin daşımaları dayandırılana qədər ildə təxminən 1 500 nəfər Xəzər dənizi vasitəsilə səfər edib. Qarşıdakı dövrdə bu istiqamətə marağın daha da artacağı gözlənilir.
Alim Bayel bildirib ki, bərə xəttinin fəaliyyətinin bərpası iki ölkə arasında sərnişin əlaqələrinin genişlənməsinə, turizm mübadiləsinin inkişafına və Orta Dəhlizin imkanlarının artırılmasına mühüm töhfə verə bilər.
Azərbaycan tərəfinin də Qazaxıstanın təklifini dəstəklədiyi qeyd olunub. Hazırda hər iki ölkənin aidiyyəti nəqliyyat qurumları sərnişin daşımalarının bərpası istiqamətində iş aparırlar.
Qeyd edək ki, Kurık-Bakı-Kurık marşrutu üzrə sərnişin daşımaları 2020-ci ilə qədər həyata keçirilib. Xəttin fəaliyyəti COVID-19 pandemiyası səbəbindən dayandırılıb.
