Nazirlər Kabinetinin 31 iyul 2026-cı il tarixli 250 nömrəli Qərarı ilə təsdiqlənən məsafə əsaslı avtomobil nəqliyyatı xidmətlərinə görə subsidiyaların hesablanması və ödənilməsi qaydasının tətbiqinə başlanılıb.
İlkinxeber.az informasiya agentliyi xəbər verir ki, yeni sistem çərçivəsində daşıyıcılara sərnişin sayına əsasən deyil, əsasən qət edilən məsafə və göstərilən xidmətin keyfiyyətinə uyğun ödənişlərin verilməsi nəzərdə tutulur.
“Brutto müqavilə” modeli üzrə marşrutlarda fəaliyyət göstərəcək avtobusların sayı, hərəkət intervalı, qət olunacaq məsafə və digər xidmət göstəriciləri əvvəlcədən müəyyənləşdiriləcək. Bunun daşıyıcı şirkətlərə uzunmüddətli planlaşdırma aparmaq imkanı verəcəyi bildirilir.
Yeni mexanizmin avtobus parkının yenilənməsinə, müasir və ekoloji cəhətdən daha təmiz nəqliyyat vasitələrinin alınmasına, texniki xidmətin yaxşılaşdırılmasına və sərnişinlərə göstərilən xidmətin səviyyəsinin yüksəldilməsinə şərait yaradacağı gözlənilir.
Bəs yeni sistem gediş haqqının artmasına səbəb ola bilərmi?
Nəqliyyat eksperti Eldəniz Cəfərov məsələ ilə bağlı bildirib ki, əvvəlki sistemdə daşıyıcı şirkətlərin gəliri böyük ölçüdə sərnişin sayından asılı idi. Yeni modeldə isə şirkətlər sərnişin sayından asılı olmayaraq müəyyən edilmiş marşrut və xidmət tələblərini yerinə yetirməlidirlər.
Ekspertin sözlərinə görə, daşıyıcılar sərnişinlərə keyfiyyətli xidmət göstərməli, avtobusları günün müəyyən saatlarında xəttə buraxmalı və müəyyən edilmiş hərəkət qrafikinə əməl etməlidirlər.
Yeni sistemin sərnişinlər üçün əsas üstünlüklərindən biri avtobusların hərəkət intervalının daha dəqiq tənzimlənməsi ola bilər. Bu halda sərnişinlərin dayanacaqlarda uzun müddət avtobus gözləməsinin qarşısının alınması mümkün olacaq.
Eldəniz Cəfərov qeyd edib ki, sistemin əsas məqsədi daşıyıcı şirkətləri daha çox və keyfiyyətli xidmət göstərməyə təşviq etməkdir. Şirkətlərin marşrut üzrə daha çox hərəkət etməsi və müəyyən edilmiş xidmət göstəricilərini yerinə yetirməsi subsidiyaların həcminə təsir göstərəcək.
Ekspert gediş haqqının artırılması ilə bağlı isə hazırda konkret qərarın olmadığını vurğulayıb. Onun sözlərinə görə, gələcəkdə ödənişlərin məsafə və vaxta uyğun hesablanması müzakirə edilə bilər. Lakin bu məsələ hələlik ekspert müzakirələri səviyyəsindədir və konkret plan kimi rəsmiləşdirilməyib.
