2027-ci ildə keçiriləcək buraxılış və qəbul imtahanlarının proqramlarında ciddi dəyişiklik nəzərdə tutulmur.
ilkinxeber.az informasiya agentliyi xəbər verir ki, bunu Dövlət İmtahan Mərkəzinin İdarə Heyətinin sədri Məleykə Abbaszadə açıqlamasında bildirib.
Onun sözlərinə görə, 9 və 11-ci siniflər üzrə buraxılış, eləcə də ali təhsil müəssisələrinə qəbul imtahanlarının proqramlarının hazırlanması yekunlaşmaq üzrədir. Proqramların yaxın günlərdə DİM-in rəsmi internet səhifəsində dərc ediləcəyi gözlənilir.
Məleykə Abbaszadə bildirib ki, proqramlar hazırlanarkən cari tədris ilində istifadə olunan dərsliklər, fənn kurikulumları və məzmun standartları təhlil edilib. Nəticədə proqramların məzmununda ciddi dəyişiklik aparılmayıb, yalnız redaktə xarakterli düzəlişlər edilib.
DİM sədri yeni dərsliklərlə bağlı da açıqlama verib. O qeyd edib ki, yeni nəşrlərdə maliyyə və media savadlılığı, rəqəmsal bacarıqlar və kibertəhlükəsizlik kimi mövzulara daha çox yer verilib. Bununla yanaşı, problem həlli, tədqiqat, tənqidi və yaradıcı düşünmə bacarıqlarının inkişafına diqqət artırılıb.
Lakin 2027-ci ildə 11-ci sinifdə təhsil alan şagirdlərin bu yeni dərsliklər üzrə təhsil almadığı nəzərə alınaraq, həmin nəşrlərdəki yeni materiallar imtahan proqramlarına daxil edilməyəcək.
İmtahan modelində hansı dəyişiklik olacaq?
2027-ci ildə 9-cu sinif üzrə buraxılış imtahanında 2026-cı ildə tətbiq olunan model qüvvədə qalacaq.
11-ci sinif üzrə buraxılış imtahanında isə yalnız xarici dil fənni üzrə dəyişiklik ediləcək. Şagirdlərin yazı bacarığının yoxlanılması üçün yeni tapşırıq formasından istifadə olunacaq. Onlardan verilmiş sual və ya fikir əsasında öz düşüncələrini ifadə edən kiçikhəcmli mətn yazmaları tələb ediləcək.
Ali təhsil müəssisələrinə qəbul imtahanlarının modelində isə dəyişiklik olmayacaq. 2026-cı ildə tətbiq edilən model 2027-ci ildə də qüvvədə qalacaq.
DİM sədri şagird və valideynlərə imtahanlara hazırlıq zamanı qeyri-rəsmi məlumatlara deyil, Mərkəz tərəfindən açıqlanacaq rəsmi proqramlara əsaslanmağı tövsiyə edib.
