Son 5 ildə Azərbaycanda gənclərin təhsilinə təxminən 2 milyard ABŞ dolları həcmində vəsait ayrılıb. Bu barədə Bakıda keçirilən İslam İnkişaf Bankı Qrupunun 2026-cı il İllik Toplantısı çərçivəsində təşkil olunan “Sərhədsiz Gənclik: Müştərək Regional Rifahın Hərəkətverici Qüvvəsi” tədbirində maliyyə nazirinin I müavini Anar Kərimov məlumat verib.
İLKİNxeber.az informasiya agentliyi xəbər verir ki, Anar Kərimov bildirib ki, Elm və Təhsil Nazirliyi yanında Təhsil Tələbə Krediti Fondu vasitəsilə indiyədək təxminən 70 min gəncə müxtəlif formalarda dəstək göstərilib.
Onun sözlərinə görə, İslam dinində təhsil yalnız iqtisadi investisiya deyil, eyni zamanda insan ləyaqətinə, məsuliyyətə və cəmiyyətə xidmətə yönəlmiş mühüm dəyərdir. Nazir müavini qeyd edib ki, Azərbaycanda gənclərə investisiya strateji inkişafın əsas istiqamətlərindən biridir.
Anar Kərimov vurğulayıb ki, gənclərə ayrılan vəsaitlər xərc deyil, milli inkişaf üçün strateji sərmayədir. O əlavə edib ki, insan kapitalına yatırım region ölkələrinin gələcək inkişaf potensialını müəyyən edən əsas amillərdəndir.
Rəsmi həmçinin bildirib ki, gənc sahibkarların daha geniş bazarlara çıxışı üçün regional əməkdaşlıq və güclü ekosistemlərin formalaşdırılması vacibdir. Onun sözlərinə görə, Azərbaycan Avropa, Mərkəzi Asiya və Yaxın Şərqin kəsişməsində yerləşərək Orta Dəhliz boyunca mühüm nəqliyyat və ticarət qovşağı rolunu gücləndirir.
—
Gənclər və idman nazirinin müavini Fərhad Hacıyev jurnalistlərə açıqlamasında bildirib ki, Azərbaycanda əhalinin təxminən 25 faizi gənclərdən ibarətdir. Uşaqlarla birlikdə bu göstərici ölkə əhalisinin təxminən yarısına bərabərdir.
Onun sözlərinə görə, tədbirdə dövlətin gənclər siyasəti, yaradılan imkanlar, dövlət proqramları və müxtəlif qurumlar tərəfindən həyata keçirilən qrant layihələri barədə məlumat verilib. Fərhad Hacıyev qeyd edib ki, 2004-cü ildə İslam Əməkdaşlıq Təşkilatı Gənclər Forumu məhz Bakıda təsis olunub və bu, region gəncləri üçün mühüm platforma rolunu oynayır.
