Bakı Şəhər Dövlət Yol Polisi İdarəsi 2026 Formula-1 Azərbaycan Qran Prisi ilə əlaqədar paytaxtda hərəkətin təşkili və tətbiq olunacaq məhdudiyyətlərlə bağlı sürücülərə müraciət edib.
“İlkinxeber.az” informasiya agentliyinin məlumatına görə, yol polisinin müraciətində sentyabrın 24-dən 26-dək Bakıya gələcək vətəndaşlara ictimai nəqliyyatdan istifadəyə üstünlük vermələri tövsiyə olunub. Paytaxt sakinlərindən isə yarış günlərində şəxsi avtomobillərdən mümkün qədər az istifadə etmələri, şəhərin mərkəzi hissəsinə ictimai nəqliyyatla getmələri xahiş edilib.
Həmçinin istismar müddəti çox olan və texniki cəhətdən nasaz nəqliyyat vasitələri ilə yola çıxmamaq tövsiyə olunur.
Məlumata əsasən, Üzeyir Hacıbəyli və Puşkin küçələrinin kəsişməsindən Bülbül prospekti istiqamətində yeni tranzit dəhlizi təşkil ediləcək.
İlkin nəqliyyat məhdudiyyəti sentyabrın 19-u saat 21:00-dan qüvvəyə minəcək. Məhdudiyyət Puşkin küçəsinin Üzeyir Hacıbəyli küçəsi və Neftçilər prospekti ilə kəsişən hissəsinə şamil olunacaq və tədbirin sonunadək davam edəcək.
Nəqliyyatın İdarəetmə Planına əsasən, Bakı Şəhər Halqasının keçdiyi küçələr və trekin əhatə etdiyi ərazilər sentyabrın 20-si saat 01:00-dan sentyabrın 28-i saat 08:00-dək nəqliyyatın hərəkəti üçün bağlı olacaq.
Məhdudiyyət tətbiq olunan ərazilərə giriş və çıxış yalnız “Yaşayış Yerinə Giriş İcazəsi” ilə mümkün olacaq.
Sentyabrın 21-i və 22-də müəyyən giriş-çıxış nöqtələri saat 07:00-dan 09:00-dək və 18:00-dan 20:00-dək nəqliyyatın hərəkəti üçün açıq olacaq. Sentyabrın 23-də isə həmin yollar saat 07:00-dan 09:00-dək və 20:00-dan 22:00-dək açıq saxlanılacaq.
Giriş nöqtələri bunlardır
Salyan şosesindən Neftçilər prospekti və Azneft dairəsi istiqamətində
M. Lermontov küçəsindən BMT-nin 50 İlliyi küçəsi və İstiqlaliyyət küçəsi istiqamətində
Bülbül prospektindən sağa Zərifə Əliyeva küçəsi və düzünə Neftçilər prospekti istiqamətində
Nizami və Puşkin küçələrinin kəsişməsindən Xəqani küçəsi istiqamətində
Üzeyir Hacıbəyli və Puşkin küçələrinin kəsişməsindən Bülbül prospekti istiqamətində
Çıxış nöqtələri isə aşağıdakılardır
Neftçilər prospektindən Bakı Dəniz Limanı, “Port Baku Mall” və “Crescent Mall” istiqamətində
İstiqlaliyyət küçəsindən Azərbaycan prospekti istiqamətində
Neftçilər prospektindən Azneft dairəsi, “Dəniz Mall” və Salyan şossesi istiqamətində
Qeyd olunan müddətdə ictimai nəqliyyat və ağır tonnajlı yük avtomobilləri istisna olmaqla, digər nəqliyyat vasitələrinin hərəkəti müəyyən edilmiş tranzit dəhlizləri üzrə təşkil ediləcək.
Tranzit dəhlizlərinin açıq olduğu vaxtlarda, fövqəladə hallar istisna olmaqla, nəqliyyat vasitələrinin parklanmasına, eləcə də sərnişinlərin minməsi və düşməsinə icazə verilməyəcək.
Tranzit dəhlizlərində maksimal sürət həddi saatda 50 kilometr müəyyənləşdirilib.
