İLKİNxeber.az informasiya agentliyi xəbər verir ki, Bakıda və ətraf ərazilərdə yaxın dövrdə dəyişkən iş qrafikinə keçid gündəmdədir.
Milli Məclisin deputatı Vüqar Bayramov sosial şəbəkə hesabında bildirib ki, “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025 ilə 2030 illəri üçün Dövlət Proqramı” çərçivəsində dövlət qurumları, təhsil və səhiyyə müəssisələri, eləcə də digər hüquqi və fiziki şəxslərin iş rejiminin dəyişkən qrafiklə təşkili planlaşdırılır.
Deputatın sözlərinə görə, sözügedən dəyişikliklərin 2026-cı ildə mərhələli şəkildə həyata keçirilməsi nəzərdə tutulur. Bununla bağlı Əmək və Əhalinin Sosial Müdafiəsi Nazirliyi, Elm və Təhsil Nazirliyi, Səhiyyə Nazirliyi, TƏBİB və Nəqliyyatı Əlaqələndirmə Şurası tərəfindən aparılan təhlillərin yaxın zamanda yekunlaşdırılması gözlənilir. Daha sonra Nazirlər Kabineti tərəfindən təsdiqlənəcək siyahılar əsasında yeni iş rejimi tətbiq ediləcək.
Vüqar Bayramov qeyd edib ki, bir çox inkişaf etmiş ölkələrdə, xüsusilə Avropada bu model artıq tətbiq olunur və müsbət nəticələr verir. Onun sözlərinə görə, fərqli işə başlama saatları nəqliyyat axınını gün ərzində bölüşdürür, səhər və axşam pik saatlarda sıxlığı azaldır, həmçinin ictimai nəqliyyatda yüklənməni balanslaşdırır.
Deputat əlavə edib ki, dəyişkən iş qrafiki təkcə sıxlığı tam aradan qaldırmır, lakin onun azaldılmasına mühüm töhfə verir. Nəqliyyat problemlərinin həlli isə yalnız infrastruktur genişləndirilməsi ilə deyil, eyni zamanda kompleks və alternativ tədbirlərin icrası ilə mümkündür.
