İlkinxeber.az informasiya agentliyi məlumat verir ki, Prezident İlham Əliyev “ADEX 2026” VI Azərbaycan Beynəlxalq Müdafiə Sərgisinin və “Securex Caspian 2026” XV Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin iştirakçılarına müraciət ünvanlayıb.
Müraciətdə qeyd olunub ki, Bakıda ənənəvi keçirilən “ADEX” sərgisinin regionun mühüm müdafiə sənayesi platformalarından birinə çevrilməsi məmnunluq doğurur. Sərgiyə marağın ildən-ilə artması, müxtəlif ölkələrin və aparıcı şirkətlərin tədbirdə iştirakı onun beynəlxalq əhəmiyyətini göstərir.
Prezident vurğulayıb ki, müdafiə qabiliyyətinin gücləndirilməsi və milli təhlükəsizliyin təmin olunması Azərbaycanın dövlət siyasətinin prioritet istiqamətlərindəndir. “ADEX” sərgisinin isə müasir texnologiyaların, hərbi texnika və innovativ həllərin nümayişi, eləcə də yeni əməkdaşlıq imkanlarının yaradılması baxımından əhəmiyyətli platforma olduğu bildirilib.
