“İLKİNxeber.az” İnformasiya agentliyinin məlumatına görə, iyun ayında ölkə üzrə orta aylıq temperatur iqlim normasına yaxın, bəzi ərazilərdə isə normadan bir qədər yüksək olacaq. Bu barədə hava və iqlim məsələləri üzrə ekspert Cavid Hüseynov danışıb.
Ekspert bildirib ki, ayın ilk günlərində Bakıda temperatur 26-31°C arasında dəyişsə də, ayın ortalarından etibarən cənub mənşəli isti hava kütlələrinin təsiri ilə temperatur kəskin yüksələcək. Paytaxtda bəzi günlərdə 35-38°C, Mərkəzi Aran və Naxçıvanda isə 40°C-yə yaxın isti müşahidə olunacaq.
Dağlıq və dağətəyi rayonlarda isə qısamüddətli leysan, şimşək və dolu ehtimalı yüksək qiymətləndirilir. Sel təhlükəsinin də yarana biləcəyi qeyd olunur.
Cavid Hüseynov vurğulayıb ki, son illər Azərbaycanda yay mövsümü daha erkən başlayır və istilik dalğaları daha uzunmüddətli xarakter alır. Bu isə qlobal iqlim dəyişiklikləri ilə əlaqələndirilir.
