Azərbaycanda ali təhsil müəssisələrində bu tədris ilindən etibarən diplomların elektron formatda təqdim edilməsinə başlanılacaq.
İLKİNxeber.az informasiya agentliyi xəbər verir ki, bu barədə ali məktəblərə Elm və Təhsil Nazirliyi tərəfindən müvafiq təlimatlar göndərilib.
Bildirilib ki, yeni sistem çərçivəsində həm bakalavr, həm də magistratura səviyyəsini bitirən məzunlar diplomlarını elektron qaydada əldə edə biləcəklər. Hazırda bununla bağlı texniki və təşkilati hazırlıq işləri aparılır.
Yeni tətbiq nəticəsində məzunlar diplomlarını “myGov” platforması üzərindən rahat şəkildə əldə edə biləcəklər.
Qeyd edək ki, indiyədək ali təhsil müəssisələrində diplomlar əsasən fiziki formada hazırlanaraq məzunlara təqdim olunurdu. Blankların hazırlanması, məlumatların yoxlanılması, qeydiyyat və imzalanma mərhələləri səbəbindən bu proses bir neçə ay çəkirdi. Elektron diplom sisteminin tətbiqi isə bu müddətin əhəmiyyətli dərəcədə qısalmasına imkan verəcək.
