Sentyabrın 21-də Azərbaycanın bəzi dağlıq və dağətəyi rayonlarında hava şəraitinin qeyri-sabit keçəcəyi gözlənilir.
“ilkinxeber.az” informasiya agentliyi xəbər verir ki, proqnozlara əsasən, həmin ərazilərdə yağış yağacaq, ayrı-ayrı yerlərdə yağıntılar leysan xarakterli olacaq. Şimşək çaxacağı, dolu düşəcəyi, gecə və səhər saatlarında isə dağlıq ərazilərdə duman müşahidə ediləcəyi bildirilir.
Baş Dövlət Yol Polisi İdarəsi gözlənilən hava şəraiti ilə əlaqədar sürücülərə diqqətli olmağı tövsiyə edib.
Qeyd olunub ki, yağıntı zamanı yolların sürüşkən olması, görmə məsafəsinin azalması və dağlıq ərazilərdə dumanın yaranması nəqliyyat vasitələrinin hərəkəti üçün əlavə risklər yarada bilər.
Sürücülərə hava və yol şəraitini nəzərə alaraq sürət həddini düzgün müəyyənləşdirmək, digər nəqliyyat vasitələri ilə ara məsafəsini artırmaq, kəskin manevrlərdən və qəfil tormozlamadan çəkinmək tövsiyə olunur.
Həmçinin avtomobillərin xarici işıq cihazlarından düzgün istifadə edilməsi, səfərdən əvvəl isə nəqliyyat vasitəsinin texniki vəziyyətinin, xüsusilə şinlərin və şüşəsilənlərin sazlığının yoxlanılması vacib sayılır.
Baş Dövlət Yol Polisi İdarəsi sürücüləri dəyişkən hava şəraitində daha ehtiyatlı olmağa və yol hərəkəti təhlükəsizliyi qaydalarına ciddi əməl etməyə çağırıb.
