Dövlət İmtahan Mərkəzi 24 may 2026-cı il tarixində keçirilmiş II və III ixtisas qrupları üzrə ali təhsil müəssisələrinə qəbul imtahanının nəticələrini açıqlayıb.
İLKİNxeber.az xəbər verir ki, imtahanda iştirak edən abituriyentlər öz nəticələrini, cavab kartlarını, cavab vərəqlərinin qrafik təsvirlərini və açıq tipli tapşırıqlar üzrə qiymətləndirmə meyarlarını DİM-in rəsmi internet səhifəsi vasitəsilə əldə edə bilərlər.
Bundan əlavə, nəticələri mobil telefon vasitəsilə öyrənmək istəyənlər imtahana buraxılış vərəqəsində göstərilən kodu 7727 nömrəsinə göndərərək məlumat ala bilərlər.
Məlumata görə, imtahanda iştirak üçün qeydiyyatdan keçmiş 56 min 847 nəfərdən 2 min 429 nəfər imtahana qatılmayıb. Qaydaları pozduqlarına görə isə 12 nəfərin nəticəsi ləğv olunub.
II ixtisas qrupu üzrə ən yüksək nəticəni Bakı şəhəri Sabunçu rayonu 169 nömrəli tam orta məktəbin məzunu Banuçiçək Rüstəmli göstərib. O, ikinci mərhələdə 397 bal toplayıb. Birinci və ikinci mərhələlərin yekun nəticəsinə əsasən 688,9 bal toplayan abituriyent qrup üzrə ən yüksək göstəriciyə imza atıb.
III ixtisas qrupu üzrə isə maksimum 400 bal nəticə əldə edən üç abituriyent olub. Bunlar Bakı şəhərində yerləşən təhsil müəssisələrinin məzunları Zeynəb Quliyeva və Aişə Qasımova, eləcə də İsmayıllı rayonunun Qalacıq kənd məktəbinin məzunu Fidan Qardaşovadır.
Ümumi nəticələrə əsasən III ixtisas qrupu üzrə ən yüksək göstərici Tovuz rayonunun Düz Qırıqlı kənd 1 nömrəli orta məktəbinin məzunu Ayan Musayevaya məxsusdur. O, hər iki mərhələnin yekununda 688,7 bal toplayıb.
Qeyd edək ki, qəbul imtahanının birinci mərhələsində maksimum 300, ikinci mərhələsində isə 400 bal toplamaq mümkündür. Müsabiqə yekun bal əsasında aparılır.
İmtahan nəticələri ilə bağlı müraciət etmək istəyən abituriyentlər əvvəlcə öz cavablarını, qiymətləndirmə meyarlarını və təqdim olunan izahları diqqətlə nəzərdən keçirməlidirlər. DİM bildirib ki, əvvəlki illərin təcrübəsi göstərir ki, apellyasiya müraciətlərinin müəyyən hissəsi qiymətləndirmə meyarları ilə tanış olmadan edilir. Bu səbəbdən əsaslandırılmamış müraciətlərə baxılmayacaq.
