Su ehtiyatlarından istifadəyə görə ödənişlərin tətbiqi ilə bağlı yayılan xəbərlər cəmiyyətdə müzakirələrə səbəb olub və bir çox vətəndaşı narahat edən suallar ortaya çıxarıb.
İLKİNxeber.az informasiya agentliyi xəbər verir ki, məsələ ilə bağlı Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarət Xidməti açıqlama verib.
Qurumdan bildirilib ki, su obyektlərindən “xüsusi məqsədlərlə istifadə” dedikdə kommersiya və sahibkarlıq fəaliyyəti çərçivəsində suyun götürülməsi, tullantı sularının axıdılması və ya su hövzələrinin istifadəsi nəzərdə tutulur. Bu proseslər adətən artezian quyuları, nasos sistemləri, kanallar və digər texniki vasitələrlə həyata keçirilir.
Rəsmi açıqlamada vurğulanıb ki, bu tip fəaliyyətlər üçün icazə yalnız hüquqi şəxslər və sahibkarlar üçün tələb olunur.
Eyni zamanda qeyd edilib ki, vətəndaşlar şəxsi ehtiyacları üçün su mənbələrindən sərbəst və ödənişsiz istifadə edə bilərlər. Buraya çimərlikdən istifadə, qayıq gəzintisi, həvəskar balıq ovu, idman fəaliyyəti və mal-qaranın suvarılması daxildir.
Bundan əlavə, mərkəzləşdirilmiş su təchizatı olmayan ərazilərdə yaşayan torpaq sahibləri öz sahələrində birinci təzyiqsiz su qatından istifadə etmək üçün quyu qazaraq onu istismar edə bilərlər.
“Əgər vətəndaş həyətində qazdığı quyudan yalnız məişət və ya suvarma məqsədilə istifadə edirsə, bu halda heç bir icazə və ya ödəniş tələb olunmur”, – deyə açıqlamada bildirilib.
Qurum tullantı sularının axıdılması ilə bağlı qaydalara da toxunub. Bildirilib ki, sahibkarlar yalnız normativlərə uyğun təmizlənmiş tullantı sularını su obyektlərinə buraxa bilərlər. Əks halda, sular əvvəlcədən xüsusi təmizləyici qurğulardan keçirilməlidir.
Həmçinin qeyd olunub ki, bəzi fəaliyyət növləri – məsələn, Xəzər dənizində kiçik gəmilərin saxlanılması, çaylarda qəfəs üsulu ilə balıqçılıq, eləcə də yeraltı sulardan istehsalat və qablaşdırma məqsədilə istifadə – xüsusi icazə tələb edir.
Məlumata görə, su obyektlərindən xüsusi məqsədlərlə istifadə üzrə ödənişlər Nazirlər Kabinetinin 14 aprel 2026-cı il tarixli qərarı ilə müəyyən edilib və istifadə növünə görə dəyişir.
Yeni qaydaların tətbiqinə 2026-cı il sentyabrın 1-dən başlanılacaq.
Təsdiqlənmiş tariflərə əsasən, sənaye məqsədilə istifadə zamanı Xəzər dənizindən götürülən hər 100 kubmetr su üçün 0,4 manat, çay və göllərdən 4 manat, yeraltı sulardan isə 40 manat ödəniş nəzərdə tutulur.
Bundan başqa, su obyektlərinə axıdılan tullantı sularına görə də ödəniş tətbiq olunacaq. Belə ki, Xəzər dənizinə axıdılan hər 100 kubmetr su üçün 1 manat, çay və göllərə isə 4 manat ödənilməsi tələb ediləcək.
