Binəqədidə aliment ödəməyən şəxs həbs edildi

Binəqədi rayonunda məhkəmənin alimentlə bağlı qərarını uzun müddət icra etməyən şəxs barəsində həbs hökmü çıxarılıb.
İLKİNxeber.az informasiya agentliyinin əldə etdiyi məlumata görə, 1986 cı il təvəllüdlü şəxs keçmiş həyat yoldaşından ayrıldıqdan sonra azyaşlı övladına görə təyin olunmuş aliment öhdəliyini yerinə yetirməyib. Nəticədə illər ərzində onun üzərində 10 min manatdan artıq aliment borcu formalaşıb.
Məlumata əsasən, məsələ ilə bağlı dəfələrlə məhkəmə qərarları qəbul edilsə də, borclu şəxs öhdəliyini icra etməyib. Hətta inzibati qaydada tətbiq olunan tədbirlər də nəticə vermədiyindən onun barəsində Cinayət Məcəlləsinin məhkəmə qərarının icra edilməməsini nəzərdə tutan maddəsi ilə cinayət işi başlanıb.
Məhkəmə iclasında təqsirləndirilən şəxs taksi sürücüsü kimi fəaliyyət göstərdiyini və aylıq gəlirinin təxminən 700 manat olduğunu bildirib. Qarşı tərəf isə onun gəlirlərinin daha yüksək olduğunu və aliment ödəməkdən qəsdən yayındığını qeyd edib.
Binəqədi Rayon Məhkəməsinin hökmü ilə təqsirləndirilən şəxs 9 ay müddətinə azadlıqdan məhrum edilib. Hökm elan olunduqdan sonra o, məhkəmə zalında həbs olunaraq nəzarətə götürülüb.