ABŞ-ın Nyu-York şəhərində yayılmış legionelloz (legioner xəstəliyi) epidemiyası nəticəsində ölənlərin sayı üç nəfərə çatıb.
İlkinxeber.az informasiya agentliyi məlumat verir ki, bu barədə şəhərin səhiyyə departamentinin rəhbəri Alister Martin jurnalistlərə açıqlama verib.
O bildirib ki, Yuxarı İst-Sayd yaşayış bölgəsində infeksiyaya yoluxan daha bir nəfərin vəfat etməsi ilə ölənlərin sayı üçə yüksəlib.
Ümumilikdə isə xəstəliyin yayılmağa başladığı ilk gündən bu yana 74 nəfərdə legionelloz təsdiqlənib. Onlardan təxminən 60 nəfər stasionar müalicəyə cəlb olunub, 8 xəstənin müalicəsi isə hazırda xəstəxana şəraitində davam etdirilir.
Departament rəhbərinin sözlərinə görə, son bir həftə ərzində yeni yoluxma halı qeydə alınmayıb və görülən operativ tədbirlər nəticəsində infeksiyanın mənbəyinin zərərsizləşdirildiyi ehtimal olunur.
Qeyd edək ki, ilk yoluxma halları iyulun 2-də aşkarlanıb. Şəhər rəhbərliyi Manhettanın Yuxarı Vest-Sayd ərazisində yerləşən 76 binanın soyutma sistemlərində bakteriya izləri aşkar edib və aidiyyəti qurumlara dərhal dezinfeksiya işlərinin aparılması tapşırılıb.
Məlumat üçün bildirək ki, legionelloz isti su mühitində sürətlə çoxalan Legionella bakteriyalarının törətdiyi ağır pnevmoniya növüdür. Xəstəlik əsasən bakteriya ilə çirklənmiş su buxarının tənəffüs edilməsi yolu ilə yayılır və insandan insana keçmir.
