ABŞ Prezidenti Donald Tramp NATO-nun Ankarada keçiriləcək sammitində iştirak edəcəyini açıqlayıb.
İLKİNxeber.az informasiya agentliyi xəbər verir ki, Ağ Evdə jurnalistlərin suallarını cavablandıran Tramp bu qərarını Türkiyə Prezidenti Rəcəb Tayyib Ərdoğana olan hörməti ilə əlaqələndirib.
ABŞ lideri bildirib ki, Ərdoğanla apardığı telefon danışığı zamanı Türkiyə Prezidenti onu şəxsən NATO sammitinə dəvət edib.
“Son aylarda baş verən hadisələri nəzərə alsaq, bu səfər baş tutmaya da bilərdi. Lakin Prezident Ərdoğanın dəvəti və ona olan hörmətim səbəbindən Ankaraya gedəcəyəm”, deyə Tramp vurğulayıb.
Türkiyəyə F 35 qırıcılarının və F 110 mühərriklərinin mümkün tədarükü ilə bağlı suala cavab verən ABŞ Prezidenti qarşıdakı səfər zamanı Ankara üçün müsbət qərarların verilə biləcəyinə işarə edib.
Tramp Türkiyənin NATO daxilində mühüm mövqeyə malik olduğunu, güclü ordusu ilə Alyansın əsas üzvlərindən biri sayıldığını qeyd edib. O, bir çox ölkələrin Türkiyənin hərbi potensialını tam dəyərləndirmədiyini də əlavə edib.
Qeyd edək ki, NATO-nun növbəti sammitinin 7 və 8 iyul tarixlərində Türkiyənin paytaxtı Ankarada keçirilməsi planlaşdırılır.
