ilkinxeber.az informasiya agentliyinin əldə etdiyi məlumata görə, Naxçıvan Muxtar Respublikasında həyata keçirilən gömrük nəzarəti zamanı külli miqdarda narkotik vasitənin ölkə ərazisindən tranzit keçirilməsinin qarşısı alınıb.
Məlumata əsasən, Naxçıvan Baş Gömrük İdarəsinin “Şahtaxtı” gömrük postunda İrandan Böyük Britaniyaya “qarışıq ərzaq” yükü daşıyan nəqliyyat vasitəsi gömrük yoxlamasına cəlb edilib. Yoxlama zamanı narkotik axtarışı üzrə xidməti itin tətbiqindən istifadə olunub.
Aparılan baxış nəticəsində yük avtomobilinin dartıcısında yerləşən soyuducunun alt hissəsində xüsusi üsulla hazırlanmış gizli saxlanc yeri müəyyən edilib. Həmin gizli bölmədən ümumi çəkisi 4 kiloqram 500 qram olan narkotik vasitə – tiryək aşkarlanaraq götürülüb.
Faktla bağlı araşdırma aparılır.
