İlkinxeber.az informasiya agentliyi məlumat verir: Naxçıvanın strateji coğrafi mövqeyinin yaratdığı imkanların tam reallaşdırılması baxımından Zəngəzur dəhlizi mühüm əhəmiyyət daşıyır.
Dəhliz çərçivəsində Naxçıvana dəmir yolu bağlantısının bərpası, Türkiyə ərazisində isə Qars–Iğdır–Naxçıvan dəmir yolunun tikintisi istiqamətində işlər davam etdirilir.
Layihənin reallaşması Naxçıvanın Azərbaycanın əsas hissəsi ilə birbaşa quru əlaqəsinin təmin olunmasına, muxtar respublikanın tranzit, logistika və ticarət imkanlarının genişlənməsinə şərait yaradacaq.
Milli Məclisin deputatı Aydın Mirzəzadə bildirib ki, Naxçıvan Azərbaycanın dövlət siyasətində hər zaman xüsusi əhəmiyyət daşıyıb. Onun sözlərinə görə, Zəngəzur dəhlizinin istifadəyə verilməsi Naxçıvanın blokadadan çıxmasına və bölgənin iqtisadi potensialının daha səmərəli istifadəsinə imkan verəcək.
Yeni nəqliyyat bağlantısının Azərbaycanın tranzit imkanlarını genişləndirəcəyi, əlavə gəlirlərin və yeni iş yerlərinin yaranmasına şərait yaradacağı gözlənilir.
