Xocalı rayonunun Daşkənd kəndi ərazisində mina partlayışı baş verib. Hadisə nəticəsində Azərbaycan Respublikasının Minatəmizləmə Agentliyinin əməkdaşı xəsarət alıb.
ilkinxeber.az informasiya agentliyi xəbər verir ki, hadisə sentyabrın 10-da ANAMA əməkdaşının xidməti vəzifəsini yerinə yetirdiyi vaxt baş verib.
Məlumata görə, 1990-cı il təvəllüdlü Anar İftixar oğlu Həsənov piyada əleyhinə minanın partlaması nəticəsində sol ayağından xəsarət alıb. İlkin olaraq Xankəndi Şəhər Mərkəzi Xəstəxanasına çatdırılan yaralı daha ixtisaslı tibbi yardım göstərilməsi üçün Bərdə Rayon Mərkəzi Xəstəxanasının Təcili tibbi yardım şöbəsinə təxliyə olunub.
Tibbi müayinələr zamanı onun sol aşıq-baldır oynağı nahiyəsində travmatik amputasiya müəyyən edilib.
Hazırda yaralı üzərində cərrahi əməliyyat aparılır.
Hadisənin başvermə şəraiti ilə bağlı araşdırma davam etdirilir.
