Azərbaycan Prezidenti İlham Əliyev sentyabrın 15-də Türkiyənin xarici işlər naziri Hakan Fidanı qəbul edib.
ilkinxeber.az informasiya agentliyi xəbər verir ki, görüşdə Hakan Fidan Türkiyə Prezidenti Rəcəb Tayyib Ərdoğanın salamlarını İlham Əliyevə çatdırıb. Dövlət başçısı salamlarına görə təşəkkürünü bildirib və öz salamlarının da Türkiyə Prezidentinə çatdırılmasını xahiş edib.
Görüş zamanı Azərbaycanla Türkiyə arasında qardaşlıq və strateji müttəfiqlik münasibətlərinin müxtəlif sahələrdə uğurla inkişaf etdiyi vurğulanıb. İki ölkə arasındakı əməkdaşlığın “bir millət, iki dövlət” prinsipi əsasında daha da möhkəmləndirilməsinin əhəmiyyəti qeyd olunub.
Tərəflər enerji sahəsində əməkdaşlığın genişləndirilməsi, o cümlədən alternativ enerji istiqamətində yeni imkanların və beynəlxalq bazarlara çıxış yollarının yaradılması barədə fikir mübadiləsi aparıblar.
Söhbət zamanı Azərbaycan və Türkiyənin Avropa ilə Asiya arasında mühüm nəqliyyat və logistika bağlantılarında oynadığı rola da toxunulub. Beynəlxalq təşkilatlar çərçivəsində iki ölkənin mövqelərinin əlaqələndirilməsinin vacibliyi diqqətə çatdırılıb.
Görüşdə həmçinin Azərbaycan-Türkiyə münasibətlərinin gələcək inkişaf perspektivləri, regional proseslər və qarşılıqlı maraq doğuran digər məsələlər müzakirə edilib.
