Dövlət qulluğuna kimlər qəbul edilə bilməz?

ilkinxeber.az informasiya agentliyi məlumat verir ki, Dövlət Qulluğu Məcəlləsinin layihəsində dövlət qulluğuna qəbul və qulluq keçmə ilə bağlı bir sıra məhdudiyyətlər nəzərdə tutulub.
Layihəyə əsasən, məhkəmənin qanuni qüvvəyə minmiş qərarı ilə fəaliyyət qabiliyyəti olmayan və ya məhdud fəaliyyət qabiliyyətli hesab edilən şəxslər dövlət qulluğuna qəbul edilə bilməz.
Bundan başqa, məhkumluğu ödənilməmiş və ya götürülməmiş şəxslər, barəsində tibbi xarakterli məcburi tədbirlərin tətbiqi barədə məhkəmə qərarı olan şəxslər də dövlət qulluğunda fəaliyyət göstərə bilməyəcəklər.
Müvafiq icra hakimiyyəti orqanının müəyyən etdiyi xəstəliklərə görə dövlət orqanlarında qulluğa yararsız hesab edilən şəxslərə də məhdudiyyət tətbiq olunacaq.
Həmçinin qulluq vəzifələrini yerinə yetirmədiyinə və ya lazımi qaydada icra etmədiyinə, eləcə də müəyyən edilmiş məhdudiyyətlərə əməl etmədiyinə görə dövlət qulluğuna xitam verilmiş şəxslərin 6 ay ərzində yenidən dövlət qulluğuna qəbuluna yol verilməyəcək.
Layihədə din xadimləri üçün də dövlət qulluğuna qəbul məhdudiyyəti nəzərdə tutulur.
Qeyd edək ki, hazırda qüvvədə olan “Dövlət qulluğu haqqında” Qanunda olduğu kimi, Dövlət Qulluğu Məcəlləsinin layihəsində də dövlət qulluğunda 65 yaş həddi ilə bağlı məhdudiyyət saxlanılır.