Afrikanın şimal sahillərindən İspaniyanın muxtar Seuta şəhərinə dəniz yolu ilə keçməyə çalışan miqrantların faciəvi taleyi davam edir. Hadisə zamanı azı 18 nəfərin həyatını itirdiyi bildirilir.
ilkinxeber.az informasiya agentliyinin əldə etdiyi beynəlxalq məlumatlara əsasən, miqrantlar Mərakeşlə Seuta arasındakı sərhəd xəttini üzərək keçməyə cəhd göstəriblər. Çətin hava və dəniz şəraiti səbəbindən çox sayda insan təhlükə ilə üzləşib.
Məlumatlara görə, son günlər bölgədə qeyri qanuni miqrasiya cəhdlərinin kəskin artdığı müşahidə olunur. Minlərlə miqrant müxtəlif yollarla Seuta ərazisinə daxil olmağa çalışır.
Baş verən hadisələr fonunda İspaniya hökuməti şəhərdə təhlükəsizlik tədbirlərini gücləndirib və əlavə hərbi qüvvələrin bölgəyə göndərilməsi barədə qərar qəbul edib. Həmçinin ölkənin Baş naziri Pedro Sançes və daxili işlər naziri Fernando Qrande Marlaskanın vəziyyətlə yerində tanış olmaq üçün Seutaya səfəri nəzərdə tutulur.
Hazırda hadisə ilə bağlı axtarış xilasetmə tədbirləri davam etdirilir və ölənlərin sayının artacağı istisna edilmir.
