ABŞ Müdafiə naziri Pit Heqsetin Yaxın Şərqdə yerləşdirilən ABŞ hərbi qüvvələrinin dislokasiya müddətini gözlənilmədən uzatdığı bildirilir. Vaşinqtonun İrana qarşı hərbi əməliyyatlarının ilin sonunadək başa çatmaması ehtimalı da nəzərdən keçirilir.
ilkinxeber.az informasiya agentliyi xəbər verir ki, bu barədə “The Wall Street Journal” qəzetinə danışan mənbələr məlumat verib.
Məlumata görə, hazırda Yaxın Şərqdə ABŞ Hərbi Dəniz Qüvvələrinə məxsus 19 gəmi, müxtəlif qırıcı eskadrilyaları, hava hücumundan müdafiə bölmələri və desant qüvvələri yerləşdirilib. Regionda təxminən 50 min ABŞ hərbçisinin qaldığı qeyd olunur.
Dislokasiya müddətinin uzadılması hərbi qulluqçuların xidmət şəraitinə və texnikanın texniki xidmət imkanlarına mənfi təsir göstərir. Logistik problemlər səbəbindən hərbçilərin yaxınlarından məktub və bağlamaları gec aldığı, təchizatın yenilənməsində də çətinliklər yarandığı bildirilir.
ABŞ Prezidenti Donald Trampın isə Tehranla hərbi əməliyyatların başa çatdırılması ideyasına şəxsi söhbətlərində müsbət yanaşdığı qeyd olunur. Tramp hesab edir ki, İrana qarşı iqtisadi təzyiqlərin davam etdirilməsi Vaşinqtonun qarşıya qoyduğu məqsədlərə nail olmasına imkan verə bilər.
Bununla belə, ABŞ hərbi qüvvələrinin regiondakı mövcudluğu davam edir və münaqişənin uzanması hərbçilərin xidmət müddətinin əvvəlcədən müəyyən edilmiş qrafikdən kənara çıxmasına səbəb olur.
Məlumata əsasən, ABŞ ordusunun hava hücumundan müdafiə bölmələri üçün standart döyüş dislokasiyası müddəti 9 aydan 12 aya qədər artırılıb.
“Spruance” və “Delbert D Black” esmineslərinin də ABŞ-nin Yaxın Şərqdə hərbi əməliyyatlara başlamasından etibarən regionda olduğu bildirilir. Hazırda həmin gəmilər dəniz blokadasında iştirak edir və ekipajları uzun müddətdir sahilə çıxmadan xidmət aparırlar.
Bundan başqa, 82-ci Hava-Desant Diviziyasının müəyyən bölmələrinin gələn il də Yaxın Şərqdə saxlanılması ehtimalı var.
ABŞ Hərbi Dəniz Qüvvələrinin “Theodore Roosevelt” aviadaşıyıcı gəmisinin də regiona mümkün dislokasiyaya hazırlanması barədə məlumat yayılıb. Gəminin döyüş növbətçiliyinin gələn ilin yazına qədər uzadıla biləcəyi bildirilir.
