ilkinxeber.az informasiya agentliyi xəbər verir ki, BMT uşaq, erkən və məcburi nikahların qarşısının alınması ilə bağlı qətnamə qəbul edib. Sənədə 60-dan çox dövlət həmmüəllif kimi qoşulub.
Qətnamədə dövlətlər maarifləndirici kampaniyalar keçirməyə, erkən və məcburi nikah qurbanlarına dəstək göstərməyə, günahkarları qanun qarşısında məsuliyyətə cəlb etməyə çağırılır.
Sənəddə həmçinin bu halların aradan qaldırılması üçün milli fəaliyyət planlarının hazırlanması və qızların təhsil imkanlarının genişləndirilməsi tövsiyə olunur.
Qətnamə layihəsini təqdim edən Syerra-Leonenin birinci xanımı Fatima Maada Bio bildirib ki, uşaq nikahlarına yalnız beynəlxalq gün təsis etməklə son qoymaq mümkün deyil. Onun sözlərinə görə, bunun üçün sərt qanunvericilik, səmərəli institutlar, təhsil və davamlı siyasi iradə vacibdir.
UNICEF-in məlumatına görə, hər il dünyada təxminən 12 milyon qız 18 yaşına çatmadan ailə həyatı qurur. Hazırda 650 milyona yaxın qadın və qızın uşaqlıq yaşlarında ərə verildiyi bildirilir.
Uşaq, erkən və məcburi nikahların aradan qaldırılması BMT-nin 2030-cu ilədək həyata keçirilməsi nəzərdə tutulan Dayanıqlı İnkişaf Məqsədlərindən biridir.
Uşaq nikahlarına qarşı yeni BMT qətnaməsi
Şərh edilməmiş
