Ukraynanın Baş naziri Yuliya Sviridenko rəsmi olaraq istefa ərizəsini ölkə parlamenti – Ukrayna Ali Radası-na təqdim edib.
ilkinxeber.az informasiya agentliyi məlumat verir ki, parlamentin sədri Ruslan Stefançuk-un açıqlamasına görə, Baş nazirin istefa məktubu artıq Ali Radanın aparatına daxil olaraq qeydiyyata alınıb.
Məlumata əsasən, bu qərar Ukrayna Prezidenti Volodimir Zelenski tərəfindən elan edilən genişmiqyaslı kadr islahatları və yeni siyasi strategiyanın tərkib hissəsidir. Prezident Sviridenkonun fəaliyyətini yüksək qiymətləndirərək ona ölkənin əsas beynəlxalq tərəfdaşlarından biri ilə əlaqələrin koordinasiyasını əhatə edən yeni vəzifə təklif edib. Qeyri-rəsmi məlumatlara görə, onun Ukraynanın ABŞ-dakı səfiri təyin olunacağı iddia edilir.
Qanunvericiliyə əsasən, Baş nazirin istefası bütün Nazirlər Kabinetinin də istefası deməkdir. Bununla belə, yeni hökumət formalaşana qədər mövcud kabinet fəaliyyətini müvəqqəti olaraq davam etdirəcək.
İstefa ərizəsinə yaxın günlərdə keçiriləcək plenar iclasda baxılması və səsverməyə çıxarılması gözlənilir.
Qeyd edək ki, Yuliya Sviridenko bu vəzifəyə 17 iyul 2025-ci ildə təyin edilmişdi.
