Baku Medikal Plaza Klinikalar Şəbəkəsinin Babək filialında pasiyent Quliyeva Şəhla Muxtar qızının müalicəsi ilə bağlı açıqlama
ilkinxeber.az informasiya agentliyinin əldə etdiyi məlumata görə, pasiyent Quliyeva Şəhla Muxtar qızı hamiləliyinin 22-ci həftəsində tibb müəssisəsinə müraciət etmiş, aparılan müayinələrdən sonra hamiləliyi klinikanın mütəxəssisləri tərəfindən tibbi nəzarətə götürülmüşdür.
28 iyul tarixində tibbi göstərişlərə əsasən və mövcud klinik protokollara uyğun olaraq pasiyent üzərində qeysəriyyə əməliyyatı icra edilmişdir. Əməliyyatın intraoperativ mərhələsi fəsadsız başa çatmışdır.
Əməliyyatdan sonrakı dövrdə pasiyentdə qəfil başlayan şiddətli baş ağrısı və qıcolma tutması müşahidə edilmişdir.
Dərhal zəruri təxirəsalınmaz tibbi yardım göstərilmiş, reanimasiya və müvafiq ixtisas həkimləri prosesə cəlb olunmuşdur.
Aparılan geniş müayinələr nəticəsində pasiyentdə III dərəcəli mitral qapaq çatışmazlığı müəyyən edilmiş və vəziyyətinin qiymətləndirilməsi məqsədilə həkim konsiliumu çağırılmışdır. Konsiliumun rəyinə əsasən, pasiyentin mövcud klinik vəziyyəti cərrahi müdaxilə üçün uyğun hesab edilməmişdir.
Hazırda onun müalicəsi reanimasiya şöbəsində multidissiplinar tibbi heyətin nəzarəti altında davam etdirilir.
Pasiyentin özünə və ailəsinə dəstəyimizi ifadə edir, yaranmış vəziyyətlə əlaqədar narahatlığımızı bildiririk.
Yenidoğulmuşun vəziyyəti stabildir və müvafiq tibbi nəzarət altındadır.
Klinikamız hər zaman pasiyent təhlükəsizliyini və göstərilən tibbi xidmətin keyfiyyətini prioritet hesab edir. Sonda qeyd etmək istərdik ki, pasiyentin ilk gündən hazırkı dövrədək bütün müalicə prosesləri təsdiq olunmuş tibbi protokollara uyğun həyata keçirilib.
