İlkinxeber.az informasiya agentliyi məlumat verir ki, ögey qızına qarşı seksual xarakterli zorakılıq əməlləri törətməkdə təqsirləndirilən şəxsin cinayət işi üzrə məhkəmə prosesi başa çatıb.
Lənkəran Ağır Cinayətlər Məhkəməsində Saatlı rayon sakini, 1988-ci il təvəllüdlü Sübhan Səfərovun (ad və soyad şərtidir) cinayət işi üzrə hökm elan olunub.
Məlumata görə, S.Səfərov ailəsi ilə Ağdamdan məcburi köçkün düşdükdən sonra Saatlı rayonunda məskunlaşıb. Daha əvvəl narkotiklə bağlı cinayətə görə məhkum olunan şəxs ötən il Ucar rayon sakini Əsmayə adlı qadınla qeyri-rəsmi nikah münasibətində yaşamağa başlayıb.
Qadın Saatlıya köçərkən əvvəlki nikahından olan, 2011-ci il təvəllüdlü qızını da özü ilə gətirib. Bir müddət sonra Sübhan Səfərovun yeniyetməyə qarşı seksual xarakterli hərəkətlər etdiyi müəyyənləşib. Bundan sonra o, polis əməkdaşları tərəfindən saxlanılıb və barəsində cinayət işi başlanıb. Yeniyetmə qız isə dayısı tərəfindən Səfərovun evindən aparılıb.
Məhkəmə iclasında təqsirləndirilən şəxs ona qarşı irəli sürülən ittihamı qəbul etməyib. Lakin ibtidai istintaq zamanı verdiyi etirafedici ifadəsi məhkəmədə elan olunub.
Məhkəmənin hökmü ilə S.Səfərov Azərbaycan Respublikası Cinayət Məcəlləsinin 152.2-1.1-ci maddəsi ilə təqsirli bilinib və 11 il müddətinə azadlıqdan məhrum edilib.
